La hestoria d’un alcuentru ente dos personaxes radicalizaos en Incorrectos, la novela de David Artime en Saltadera

Aníbal ye un violentu neonazi, bien conocíu nos ambientes de la estrema derecha madrileña. Maitane ye una militante d’ETA implicada en dos asesinatos. Un día los sos caminos entecrúciense y les sos vides cambien pa siempre.

Entamen entós a percorrer un peligrosu camín a la busca d’un porvenir dignu. Atrás, el so pasáu. Delantre, un futuru inciertu. En mediu, l’aislamientu, la soledá y la opresión d’una sociedá hipócrita que solo perdona los errores cuando-y interesa. Pero ellos dos quieren siguir caminando. Quieren vivir. Quieren arrepentise… anque nun sepian mui bien de qué.

Incorrectos, extraordinaria segunda novela de David Artime Coto (Candás, 1979) depués de la exitosa La bufanda (2010), ye sobre too una denuncia. Col telón de fondu del procesu de reinserción de presos d’ETA y de la violencia na cai de grupos radicales, esta historia quier ser un berríu contra la dictadura de lo políticamente correcto.

Nuna sociedá bipolarizada, na que naide ye llibre, la ética sucumbió ente la estética y el sistema obliga al individuu non a ser bona xente, sinón a paecelo. Ye la tiranía del posturéu bienpensante. Quien se sal de los cánones yá sabe lo que-y queda: la esclusión y el linchamientu.

Sobre l'autor

David Artime Coto (Candás, 1979) ye periodista y escritor. Ganador de dellos premios lliterarios, ye responsable d’una adaptación teatral de la novela José, de Palacio Valdés y de la novela La bufanda (Trabe, 2010).

Incorrectos
autorDavid Artime Coto
editorialSaltadera
ISBN9788494755262
Preciu22,00€

Asturlibros Noroeste

Asturlibros Noroeste Empresa distribuidora independiente de libros, papelería molona, álbum ilustrado y cómic. www.asturlibros.es